Félag íslenskra hjúkrunarfræðinga (Fíh) fagnar tillögum tveggja skýrslna um mönnunarviðmið í hjúkrun sem unnar voru af vinnuhópum skipuðum af heilbrigðisráðherra og gefnar út af heilbrigðisráðuneytinu. Í skýrslunum er lögð áhersla á að mönnunarviðmið byggi á gagnreyndri þekkingu, mældu hjúkrunarálagi og gæðum þjónustunnar. Niðurstöður síðari skýrslunnar sýna um 40% undirmönnun á þeim 16 bráðalegudeildum Landspítala og Sjúkrahússins á Akureyri sem greiningin nær til. Fíh telur slíka undirmönnun óásættanlega. Í báðum skýrslunum er jafnframt lögð áhersla á embætti yfirhjúkrunarfræðings innan stjórnsýslunnar.

Í dag og næstu tvo daga fer fram 123. þing Evrópusamtaka hjúkrunarfræðinga sem haldið er í Vín að þessu sinni. Helga Rósa Másdóttir, formaður Fíh, situr þingið ásamt Helgu Pálmadóttur, sviðsstjóra fagsviðs Fíh.

Hjúkrunarþing Félags íslenskra hjúkrunarfræðinga var haldið 7. október í samstarfi við Deild sérfræðinga í hjúkrun. Yfirskrift þingsins var „Sérfræðingar í hjúkrun: framtíð, hlutverk og stefna“ og var markmið þess að hefja markvissa stefnumótun félagsins í málefnum sérfræðinga í hjúkrun.

Félag íslenskra hjúkrunarfræðinga tók þátt í kynningarfundi fyrir hagsmunaaðila um Gagnreynda heilsu sem haldinn var í Reykjavík 6. október. Verkefnið er samstarfsverkefni á landsvísu sem miðar að þróun, staðfærslu, innleiðingu og viðhaldi klínískra leiðbeininga, gæðastaðla og gæðavísa í íslensku heilbrigðiskerfi.

Öflugt heilbrigðiskerfi, örugg mönnun og aukið norrænt samstarf voru í brennidepli á málþingi NNF, Samvinnu hjúkrunarfræðinga á Norðurlöndunum, um viðbúnað og viðnámsþrótt heilbrigðiskerfa, sem fram fór í Færeyjum 9.–10. september síðastliðinn.

Opnað hefur verið fyrir skráningar á 31. heimsþing Alþjóðaráðs hjúkrunarfræðinga sem haldið verður 8.-11. júlí 2027 í Taipei. Þema heimsþingsins að þessu sinni verður Empowered Nurses: New Horizons Transforming Health and Care.

Í morgun tók Félag íslenskra hjúkrunarfræðinga á móti hópi hjúkrunarfræðinga af Landspítala á skrifstofu félagsins. Heimsóknin var hluti af starfsþróunarári hjúkrunarfræðinga af erlendum uppruna sem starfa á Landspítala.

Félag íslenskra hjúkrunarfræðinga (Fíh) og Símenntun Háskólans á Akureyri (SMHA) hafa gert með sér samning sem veitir félagsfólki Fíh 85% afslátt af völdum námskeiðum hjá SMHA á haustmisseri.

Háskóli Íslands (HÍ), Háskólinn á Akureyri (HA) og Félag íslenskra hjúkrunarfræðinga (Fíh) telja tímabært að breyta námi til starfsréttinda hjúkrunarfræðinga í fimm ára nám sem skiptist í þriggja ára B.S.-nám og tveggja ára meistaranám. Námið yrði þá sambærilegt öðrum námsleiðum sem áður voru þrjú eða fjögur ár til starfréttinda s.s. sjúkraþjálfun, félagsráðgjöf, kennaranám og verkfræði, og yrði sambærilegra við nám helstu háskólamenntaðra samstarfsstétta í heilbrigðisvísindum á Íslandi. Fleiri þættir styðja breytta námsskrá s.s. samfélagsþættir og framtíðarþróun. Breytingar krefjast undirbúnings og því hafa verkefnishópar við Hjúkrunar- og ljósmóðurfræðideild HÍ og Hjúkrunarfræðideild HA unnið þétt saman að undirbúningi þessara breytinga síðastliðin tvö og hálft ár í samstarfi við Félag íslenskra hjúkrunarfræðinga og Ljósmæðrafélag Íslands, auk þess sem leitað hefur verið til forystu hjúkrunar í landinu.