Stjórn og framkvæmdaráð Félags íslenskra hjúkrunarfræðinga (Fíh) tók haustið 2016 ákvörðun um að vinna skýrslu um vinnumarkað hjúkrunarfræðinga og kanna jafnframt hversu marga hjúkrunarfræðinga vantar til starfa á heilbrigðisstofnunum á Íslandi. Fyrir 10 árum var síðasta könnun gerð á mönnun í hjúkrun og í kjöl ­ farið var skýrslan Mannekla í hjúkrun gefin út árið 2007.

Greining á vinnumarkaði hjúkrunarfræðinga í skýrslunni er byggð á lista Embættis landlæknis yfir hjúkrunarfræðinga með starfsleyfi, upplýsingum úr félagatali Fíh, Lífeyrissjóði starfsmanna ríkisins (LSR), Lífeyris ­ sjóði hjúkrunarfræðinga (LH) og upplýsingum um fjölda úrskrifaðra hjúkrunarfræðinga úr Háskóla Íslands (HÍ) og Háskólanum á Akureyri (HA). Niðurstöður um fjölda hjúkrunarfræðinga, sem vantar til starfa, byggjast á könnun sem fram fór meðal framkvæmdastjóra hjúkrunar og hjúkrunarforstjóra á öllum heilbrigðisstofnunum1 sem höfðu hjúkrunarfræðinga í vinnu í október og nóvember 2016. Upplýsingar um launakjör hjúkrunar fræðinga og annarra stétta er byggð á upplýsingum um meðaltalslaun starfmanna ríkisins sem finna má á vef fjármálaráðuneytisins.

Markmið skýrslunnar er að:

• varpa ljósi á vinnumarkað hjúkrunarfræðinga
• fá yfirlit yfir mönnun í hjúkrun á heilbrigðisstofnunum
• kanna hversu marga hjúkrunarfræðinga vantar til starfa
• spá fyrir um stöðu mönnunar í hjúkrun næstu fimm árin, eða fram til ársins 2021
• bera saman kjör hjúkrunarfræðinga við aðra opinbera starfsmenn
• koma með tillögur til úrbóta